दार्चुला, फागुन ३ गते ।
भारतको स्वतन्त्रता दिवसको अवसरमा भारतीय दुतावासबाट प्राप्त पुस्तकहरू ब्यास गाउँपालिकाको तीनवटा विद्यालयहरूलाई हस्तान्तरण गरिएको छ ।
गत वर्षको स्वतन्त्रता दिवसको अवसरमा व्यास गाउँपालिकाको हिमालय मावि हुती, सम्पाल मावि सुन्सेरा र सिद्धमावी सिनालाई पुस्तकालयका लागि दूतावासबाट पुस्तक प्राप्त भएको नेपाल भारत मैत्री संघका केन्द्रिय सदस्य तथा व्यास गाउँकार्यपालिका सदस्य बासुदेब ऐतवालले जानकारी दिनुभयो ।
गत वर्ष प्राप्त भएका पुस्तकहरू गाउँपालिकामा पुगाइएको भएपनि कोरोना प्रभावले विद्यालय बन्द हुदाँ वितरण गर्न सकिएको थिएन । पुस्तकहरु सोमबार व्यास गाउँपालिका अध्यक्ष दिलिप सिह बुढाथोकीले सम्बन्धित विद्यालयका प्रधानाध्यापकहरुलाई हस्तान्तरण गरेका छन् । भारतीय दूतावासबाट प्राप्त धार्मीक, साहित्यिक, शब्दकोश, सामान्य ज्ञान सम्बन्धी पुस्तकहरु हस्तान्तरण गरिएको ऐतवालले जानकारी दिनुभयो ।
भारतीय दुतावासले पछिल्लो समय दार्चुलामा सहयोग बढाएको छ । भारतीय दुतावासले गत वर्ष व्यास गाउँपालिका सहित जिल्लाका विभिन्न गाउँपालिकाहरुलाई एम्बुलेन्स दिएको छ भने सदरमुकाम खलंगामा रहेको महेन्द्र नमुना माध्यमिक विद्यालयलाई बस दिएको छ । त्यसैगरि भारतीय दूतावासकै सहयोगमा महेन्द्र नमुना माविको विद्यालय भवन र महाकाली नगरपालिका वडा नं ८ धापमा रहेको मालिकार्जुन नमुना मावि धापको विद्यालय भवन निर्माण गरिएको छ ।
