दार्चुला, वैशाख २१ गते ।
यार्सागुम्बा संकलनका लागि अनिवार्य रुपमा अनुमतिपत्र लिनुपर्ने व्यवस्था गरिएको छ । अपी नाम्पा संरक्षण क्षेत्र कार्यालयले सुचना जारी गर्दै अनुमतिपत्र विना यार्सागुम्बा संकलन गर्न नपाइने जनाएको छ ।
यार्सागुम्बा व्यवस्थापन निर्देशिका–२०७३ को प्रावधान अनुसार सबै संकलकहरुले अनिवार्य रुपमा अनुमतिपत्र लिनुपर्ने अपी नाम्पा संरक्षण क्षेत्र कार्यालयले जनाएको छ । प्रत्येक वर्षको जेठ दोस्रो सातादेखि एक महिनासम्म यार्सागुम्बा संकलन गर्न पाइने व्यवस्था भएको निमित्त कार्यालय प्रमुख तोयराज जोशीले बताउनुभयो ।
अनुमतिपत्र विना यार्सा संकलन नपाइने र संकलन अनुमति एक महिना अवधि हुने व्यहोराको सार्वजनिक सुचना समेत कार्यालयले जारी गरेको छ । निर्देशिकाको प्रावधान कडाइका साथ पालना गराउन आवश्यक तयारी गरिएको कार्यालयका सुचना अधिकारी इन्द्र सिंह नगारीले बताउनुभयो ।
संरक्षण क्षेत्रभित्र यार्सागुम्बा संकलन हुने सबै क्षेत्रमा अनुमतिपत्र अनिवार्य गरिएको उहाँले बताउनुभयो । ‘यार्सा संकलन हुने सबै वनक्षेत्रमा हामी स्थलगत अनुगमन गर्छौ, कुनै पनि व्यक्तिले विना संकलन अनुमतिपत्र यार्सा संकलन गर्न पाउने छैनन्’ उहाँले भन्नुभयो ।
अपीनाम्पा संरक्षण क्षेत्र कार्यालयका कर्मचारी र सुरक्षाकर्मीहरुको टोलीले संकलनपत्र लिए नलिएकोबारे यार्सा संकलन हुने क्षेत्रमा अनुगमन गर्ने तयारी समेत छ । जिल्लास्तरमा प्रमुख जिल्ला अधिकारीको अध्यक्षतामा सुरक्षा प्रमुख र सरोकारवालाहरुबीच यसबारे बैठक राखेर निर्णय समेत गरिएको सुचना अधिकारी नगारीले बताउनुभयो ।
अपी नाम्पा संरक्षण क्षेत्रभित्रका नागरिकले ५ सय रुपैयाँ, संरक्षण क्षेत्रबाहिर तर दार्चुला जिल्लाका नागरिकले २ हजार रुपैयाँ र दार्चुला जिल्ला बाहिरका नागरिकले ३ हजार रुपैयाँ शुल्क तिरेर यार्सागुम्बा संकलन अनुमतिपत्र पाउने व्यवस्था छ । यार्सा संकलकहरुको सुविधाका लागि खलंगास्थित कार्यालयका साथै सुन्सेरा, खण्डेश्वरी, बिटुले, खार, व्यास, सिप्टी, पारिबगर, दुम्लिङ र हिकिला रेन्जपोष्टबाट समेत संकलन अनुमतिपत्र प्राप्त गर्न सकिने व्यवस्था गरिएको छ ।
संकलन अनुमतिपत्र विना यार्सा भेटाइएमा संकलित यार्सागुम्बा जफत गरी नियमानुसार कारवाही गरिने समेत जनाइएको छ । संरक्षण क्षेत्र कार्यालयले वैशाख १६ गते सुचना प्रकासित गरी अनुमतिपत्र वितरणको कार्य सुरु भएको बताएको छ ।
यार्सागुम्बा संकलन अवधिमा अनुमतिपत्र साथमा राख्न भनिएको छ । संकलन इजाजतविना कुनै पनि प्रकारको जडिबुटी संकलन गर्न नपाइने जानकारी पनि गरिएको छ । वन तथा वन्यजन्तुलाई क्षतिपुग्ने कुनै पनि प्रकारको गतिविधि नगर्न आग्रह गरिएको छ भने गैरकानुनी काम भएर कानुनबमोजिमको कारवाही गरिने पनि भनिएको छ ।
विगत केही वर्षमा कोभिड महामारीका कारण यार्सागुम्बा संकलकलाई अनुमतिपत्र दिने कार्य प्रभावकारी बन्न सकेको थिएन । यो वर्षदेखि कडाइका साथ यार्सागुम्बा संकलकहरुलाई अनुमतिपत्र वितरण गर्ने तयारी अपी नाम्पा संरक्षण क्षेत्र कार्यालयले गरेको छ । संरक्षण क्षेत्रभित्र खुकुरी, बञ्चरो र बन्दुक जस्ता हतियार आफ्नो साथमा लैजान नपाइने जानकारी पनि गराइएको छ ।
