दार्चुला, कार्तिक १२ गते ।
महाकाली लोकमार्ग अन्र्तगतको दार्चुला–तिंकर सडक खण्डको संघिय संसदको विकास तथा प्रविधि समितिले निरीक्षण गरेको छ ।
समिति सभापति कल्याणी खड्का नेतृत्वको १३ सदस्यिय टोलीले नेपाली सेनाको हेलिकोप्टरमार्फत उक्त सडकको निरीक्षण अनुगमन गरेको जिल्ला प्रहरी कार्यालय दार्चुलाका प्रहरी निरीक्षक एबं सूचना अधिकारी पुस्कर सिह ऐरीले जानकारी दिनुभयो ।
शुक्रबार विहान करिब १० बजे आएको उक्त समिति हेलिकोप्टर मार्फत ब्यास गाउँपालिकाको वडा नं १ छाङरु पुगेको थियो । छाङरुमा स्थानिय संग छलफल गरि नेपाली सेनाले ब्यास गाउँपालिका २ मा निर्माण गरिरहेको सडकको हवाई निरीक्षण समेत गरेको उहाँले बताए । ब्यास गाउँपालिका ४ सुन्सेरामा रहेको नेपाली सेनाको विकास निर्माण दलको क्याम्पमा पुगेर समितिले तिंकर सडकको निर्माण प्रगतिबारे जानकारी लिएको छ । सडकको निरीक्षण गरि टोली दिउसो १ बजे बझाङका लागि प्रस्थान गरेको थियो ।
आर्थिक बर्ष २०६५/०६६ मा निर्माण सुरु भएको दार्चुलाको अतिक्रमित भूमी कालापानी, लिपुलेक क्षेत्र जोड्ने दार्चुला–तिंकर सडकको हाल सम्म ४३ किलोमिटर ट्रयाक मात्रै खोलिएको छ । रणनीतिक तथा पर्यटकिय महत्व बोकेको सडकको निर्माण कछुवा गतीमा हुन थालेपछि नेपाल सरकारले गत बर्ष कुल १३४ किलोमिटर सडक मध्ये कडा चट्टानी भु–भाग रहेको ८७ किलोमिटर सडक खण्ड निर्माणको जिम्मा नेपाली सेनालाई दिएको थियो । चालु आर्थिक बर्ष देखि ब्यास गाउँपालिका वडा नं २ क्षेत्रमा नेपाली सेनाले सडकको निर्माण कार्य गरिरहेको छ ।
