दार्चुला, साउन १५ गते ।
महाकाली नदीमा तुईन तरेर भारत जादाँ नेपाली नागरिक महाकाली नदीमा बेपत्ता भएको घटनाबारे छानविन गर्न दार्चुलाका प्रमुख जिल्ला अधिकारी सिद्धराज जोशीले भारतको पिथौरागढका जिल्ला अधिकारी आनन्द स्वरुपलाई पत्राचार गरेका छन् ।
शुक्रबार विहान ८ बजे तिर ब्यास गाउँपालिकाको वडा नं २ मालका स्थानिय तुईन तर्ने क्रममा भारतीय एसएबीले तुईन काट्दा महाकाली नदीमा बेपत्ता भएको घटनास्थलमा रहेका स्थानियहरुको आरोप छ । घटनाबारे छानविन गरि आवस्यक कारवाहीका लागि प्रमुख जिल्ला अधिकारीले भारतको पिथौरागढ जिल्लाका समकक्षी आनन्द स्वरुपलाई पत्राचार गरेको दार्चुलाका सहायक प्रमुख जिल्ला अधिकारी जोत्सना भट्ट जोशीले बताउनुभयो । मेलबाट पिथौराढका जिल्ला अधिकारीलाई पत्राचार गरेका छौ, बोधार्थमा पिथौरागढको धार्चुला तहशिलका उपजिल्ला अधिकारी अनिल कुमार शुक्लालाई पनि सम्बोधन गरेका छौ सहायक प्रमुख जिल्ला अधिकारी भट्टले भन्नुभयो । नेपाल तर्फबाट पनि घटनाबारे छानविन भइरहेको उहाँको भनाई छ । हाल सम्म घटनाबारे सत्य तथ्य नखुलेको जिल्ला प्रहरी कार्यालय दार्चुलाका प्रहरी निरीक्षक एबं सूचना अधिकारी नरेन्द्र बहादुर चन्दको भनाई छ । प्रहरी र सशस्त्र प्रहरीको टोली घटनास्थल पुगेर अनुसन्धान गरिरहेको उहाँको भनाई छ ।
स्थानियहरुको दाबीः एसएसबीले तुईन काटेर धामी नदीमा परेका हुन्
एसएसबीले तुईन काट्दा जयसिह धामी नदीमा खसेको भन्दै तुईन काट्ने एसएसबी हरुलाई कारवाही हुनुपर्ने माग सहित स्थानियहरुले प्रमुख जिल्ला अधिकारी सिद्ध राज जोशीलाई ज्ञापन पत्र दिएका छन् ।
ब्यास गाउँपालिका २ मालका पाँच छ जना स्थानियहरु शुक्रबार मालघाटमा महाकाली नदी माथि तुईन तरेर भारतको बाटो हुदै खलंगा बजार आउन लागेका थिए । दुई जना महाकाली नदीमा तुईन तरि भारतको सडकमा पुगिसकेका थिए । तुईनमा तर्ने पालो जयसिह धामीको रहेको थियो । उनी तर्ने बेला दुई जना भारतीय एसएसबी पुगेको तथा तुईनमा तर्दै गर्दा तार काटीदिदाँ तार सहित मान्छे नदीमा खसेको स्थानियहरुको भनाई छ । अनिता धामी, कल्यान सिह धामी र विक्रम सिह रङकोलीले उक्त घटना प्रत्यक्ष दखेको प्रमुख जिल्ला अधिकारीलाई दिएको ज्ञापन पत्रमा उल्लेख छ ।
बाच्न पाउने मानिसको न्युनतम अधिकारलाई चुनौती दिदै तुईन काटेर ज्युदै मान्छे नदीमा बगाएको हुदाँ उक्त घटना गराउने भारतीय एसएबीहरुलाई कडा कारवाहीका लागि पहल गरिदिन आफन्तहरुले प्रमुख जिल्ला अधिकारीलाई अनुरोध गरेका छन् ।
सम्बन्धित समाचार: तुईन तर्ने क्रममा एक जना महाकाली नदीमा बेपत्ता
