काठमाडौं, साउन २० गते ।
प्रधानमन्त्री केपी ओलीले राष्ट्रिय गौरव एवं रणनीतिक महत्त्वको काठमाडौं–तराई/मधेश द्रुतमार्ग (फास्ट ट्रयाक) सडक आयोजनाअन्तर्गत घट्टेपाखा–धेद्रे सुरुङको स्विच थिचेर ‘ब्रेक थ्रु’ गरेका छन्।
मकवानपुरको बकैया गाउँपालिका– १२ धेद्रेमा सोमबार एक समारोहबीच प्रधानमन्त्री ओलीले काठमाडौं–निजगढतर्फको १.७२८ किलाेमिटर लामो सुरुङ ब्रेक थ्रु गरेका हुन्। निजगढ–काठमाडौंतर्फको १.६५३ किलाेमिटर धेद्रे सुरुङ भने गत जेठ ११ गते नै ‘ब्रेक थ्रु’ भइसकेको छ। धेद्रे सुरुङ छिचोलिएसँगै प्याकेज नं. २ अन्तर्गतका सबै सुरुङ खोल्ने काम सम्पन्न भएको छ।
कार्यक्रममा प्रधानसेनापति प्रभुराम शर्माले आयोजनाको हालसम्मको निर्माण प्रगति र चुनौतीबारे प्रधानमन्त्री ओलीलाई अवगत गराउँदै आयोजनाको भौतिक प्रगति ३५.९८ प्रतिशत रहेको जानकारी दिए।
लेनडाँडामा रहेको निजगढ–काठमाडौंतर्फको १.६१२ किलाेमिटर र काठमाडौं–निजगढतर्फको १.६३३ किलाेमिटर सुरुङ यसअघि नै खनिसकिएको छ। ३.३२२ किलाेमिटरको निजगढ–काठमाडौंतर्फको महादेवटार सुरुङ हालसम्म २.२९ किलाेमिटर तथा ३.३८६ किलाेमिटरको काठमाडौं–निजगढतर्फको २.२८८ किलाेमिटर सुरुङ खनिसकिएको छ। सो सुरुङ यसै वर्ष सम्पन्न गर्ने गरी काम भइरहेको नेपाली सेनाले जनाएको छ।
द्रुतमार्ग २०८३ चैत मसान्तसम्ममा सम्पन्न गर्ने लक्ष्य छ। आयोजनालाई १३ प्याकेजमा विभाजन गरी निर्माण गरिएको छ। आयोजनाअन्तर्गत विभिन्न स्थानमा निर्माण हुने ८९ मध्ये ८५ पुल ठेक्का व्यवस्थापन भई कार्यान्वयनको चरणमा छन्। बाँकी चार पुल खोकना क्षेत्रमा छन्। सो क्षेत्रमा जग्गा अधिग्रहणसम्बन्धी समस्याका कारण निर्माणमा जान नसकेको सेनाको भनाइ छ।
प्रस्थान विन्दु ललितपुरको खोकना र अन्तिम विन्दु बाराको निजगढ रहेको सो सडकको लम्बाइ ७०.९७७ किलोमिटर छ। द्रुतमार्ग पहाडी भू–भागमा २५ मिटर र तराई भूभागमा २७ मिटर फराकिलो हुनेछ। द्रूतमार्गमा १०.३०९ किलाेमिटर लम्बाइको ६ वटा सुरुङ बन्नेछ। आयोजनाअन्तर्गत देवीचौरमा एक किलाेमिटर, सिसौटारमा ०.३९ किलाेमिटर, चन्द्राम भिरमा २.२५ किलाेमिटर, महादेवडाँडामा ३.३५५ किलाेमिटर, धेद्रेमा १.६९१ र लेनडाँडामा १.६२३ किलाेमिटर लामो सुरुङ निर्माण हुनेछ।
सो सडकमा विभिन्न स्थानमा १२.८८५ किलाेमिटर लम्बाइको ८९ वटा पुल निर्माण हुनेछ। बुदुनेमा दुईवटा विश्रामस्थल तथा खोकना, बुदुने र निजगढमा एक–एकवटा इन्टरचेन्ज र टोल प्लाजा निर्माण गरिनेछ।
मन्त्रिपरिषद्को ०७४ वैशाख २१ गतेको निर्णयअनुसार सो आयोजना निर्माण व्यवस्थापनको जिम्मेवारी नेपाली सेनाले गरिरहेको छ। सो आयोजनाको ०७४ जेठ १४ गते तत्कालीन प्रधानमन्त्री पुष्पकमल दाहाल ‘प्रचण्ड’ले बाराको निजगढमा शिलान्यास गरेका थिए। सरकारले ०७४ साउन २७ गते सडक विभागबाट सेनालाई आयोजना हस्तान्तरण गरेको थियो। रासस
