दार्चुला, माघ १८ गते ।
दार्चुला तिंकर सडक खण्ड अन्तर्रगतको ब्यास गाउँपालिका वडा नं ३ तुसरपानी देखि वडा नं २ कोठेधार सम्मको सडक निर्माणको जिम्मा नेपाली सेनालाई दिइएको छ ।
नेपाल सरकारको मन्त्री परिषदले स्वीकृत गरेका निर्णय मंगलबार सार्वजनिक गर्दै नेपाल सरकारका प्रवक्ता एवं सञ्चार सूचना तथा प्रविधि मन्त्री ज्ञानेन्द्र बहादुर कार्कीले तुरसपानी देखि कोठेधार सम्मको ४ किलोमिटर सडक निर्माणको जिम्मा नेपाली सेनालाई दिने निर्णय भएको बताउनुभएको छ ।
२०६५ साल देखि निर्माण कार्य सुरु भएको दार्चुला तिंकर सडकको निर्माण कछुवा गतिमा भएपछि यस अघि केपी ओली सरकारले कोठेधार देखि तिंकर सम्मको ८७ किलोमिटर सडक निर्माणको जिम्मा नेपाली सेनालाई दिइएको थियो ।
सेनालाई जिम्मा दिएको बाहेक सुन्सेरा देखि कोठेधार सम्म ६ किलोमिटर सडकको मात्रै ट्रयाक खोल्न बाकि थियो । ठेक्का प्रक्रियाबाट २ बर्षमा ६ किलोमिटर सडक निर्माणको काम नभएपछि बाकि रहेको ४ किलोमिटर सडक सरकारले नेपाली सेनालाई दिएको छ ।
यो सँगै नेपाली सेनाले दार्चुला तिंकर सडक खण्डमा ९१ किलोमिटर सडकको जिम्मा पाएको छ ।
नेपाली सेनाले चालु आर्थिक बर्ष देखि कोठेधारमा सडक निर्माणको काम सुरु गरिसकेको छ । तर तुसरपानी देखि कोठेधार सम्मको ४ किलोमिटर सडकको ट्रयाक खोल्न बाकि रहेका कारण नेपाली सेनालाई निर्माण सामग्री देखि मेसिन ढुवानीमा समस्या भइरहेको छ । ट्याक खोल्न बाकि सडक समेत नेपाली सेनाले पाएपछि सेनालाई काम गर्न सजिलो हुने अपेक्षा गरिएको छ ।
दार्चुला तिंकर सडक खण्ड अन्र्तगत दार्चुला सदरमुकाम खलंगा देखि ब्यास गाउँपालिकाको केन्द्र सुन्सेरा सम्म लगभग ४२ किलोमिटर सडकको ट्रयाक खोलिएको छ ।
नेपाली सेनाले दार्चुला तिंकर सडक अन्र्तगत कोठेधार–तिंकर सडक निर्माणका लागि गत आर्थिक बर्षमा सुन्सेरा र दुम्लीङमा क्याम्प निर्माणको काम सम्पन्न गरेको थियो भने चालु आर्थिक बर्षमा हाल सम्म ३ मिटर चौडाइको १ दशमलब २५ किलोमिटर सडकको ट्याक खोलिएको नेपाली सेनाले सार्वजनिक गरेको सूचनामा उल्लेख छ ।
यस आर्थिक वर्षमा यस आर्थिक वर्षमा ३ देखी ४ मिटर चौडाइको ३ किलोमिटर र ५ देखि ६ मिटर चौडाइको ४ किलोमिटर ट्रयाक निर्माण गर्ने लक्ष्य रहेको नेपाली सेनाले जनाएको छ ।
