दार्चुला, असार ३१ गते ।
नेपाल-चीन सिमानाका तिंकर खुलेकाे छ । चिनियाँ पक्षले नाका खुलेकाे जानकारी पठाएको छ र नेपाली व्यापारीलाई ताक्लाकाेट आउन भनेको छ ।
ताक्लाकाेटमा रहेका नेपाली व्यापारीहरूमार्फत नाका खुला गरिएको जानकारी दिइएको छ । आइतबार नाका खुलेकाे जानकारी प्राप्त भएको व्यास गाउपालिका-१ का वडाअध्यक्ष अशाेक सिंह बाेहराले बताउनुभयो ।
चिनियाँ प्रशासनले ताक्लाकाेटमा रहेका नेपाली व्यापारीमार्फत तिंकर नाका खुला गरिएको जानकारी दिए पनि अौपचारिक जानकारी नेपाली पक्षलाई दिएको छैन ।
व्यासक्षेत्रका स्थानीयमार्फत नाका खुला गरिएको अनाैपचारिक जानकारी मिलेकाे दार्चुलाका प्रमुख जिल्ला अधिकारी यज्ञराज जाेशीले बताउनुभयो ।
नाका सञ्चालनकाे अौपचारिक जानकारी प्राप्त नभए पनि तिंकर नाकाबाट स्थानीयकाे आवतजावत हुने तयारी थालिएको छ । छाङरूका स्थानीयले एक-दुई दिनभित्रै ताक्लाकाेटतर्फ प्रस्थान गर्ने तयारी गरेको वडाअध्यक्ष बाेहराले बताउनुभयो ।
तिंकर गाउँका स्थानीय भने साउन ६ गतेकाे पुर्णिमापछि ताक्लाकाेट जाने तयारीमा छन् ।
तिंकरकाे छियालेकमा रहेको सशस्त्र प्रहरीको विओपिले तिंकर नाका भएर ताक्लाकाेट आवतजावत गर्ने सबै नागरिकको अभिलेख राख्ने व्यवस्था गरेको छ ।
गत जेठ १७ गते ताक्लाकाेटस्थित चिनियाँ अधिकारीहरूसंग दार्चुलाका प्रजिअसहित सुरक्षा अधिकारीहरूले भिडियो कलमार्फत नाका सञ्चालनबारे छलफल गरेका थिए । उक्त छलफलमा असार ११ गतेदेखि नाका सञ्चालन हुने तय भएको थियाे ।
केही प्राविधिक तयारी नपुगेको भन्दै चिनियाँ अधिकारीले असार २६ गते नाका खाेल्ने अर्को मिति पठाएका थिए । तर यसबारे अाैपचारिक जानकारी दिइएको थिएन । असार ११ मा खाेल्ने भनिएको तिंकर नाका १५ दिनपछि असार २६ गते खुल्ने अनाैपचारिक जानकारी पाएपछि जिल्ला प्रशासनले गृह मन्त्रालय र परराष्ट्र मन्त्रालयलाई जानकारी गराएको थियाे ।
असार २६ गते पनि पुर्वनिर्धारित मितिमा नाका खुलेन । चिनियाँ पक्षको प्राविधिक तयारी नपुगेको अनाैपचारिक जानकारी दिइएको थियाे । तर, असार २६ गते नाका खुल्ने तालिकाकाे चार दिनपछि असार ३० गते नाका खुला गरिएको जानकारी दिइएको छ ।
तिंकर नाका सञ्चालन गर्न दार्चुलाका प्रजिअसहित सुरक्षा अधिकारीहरूकाे टाेली असार ११ र असार २६ गते चीनकाे ताक्लाकाेट जाने तयारी थियाे । तर निर्धारित मितिमा नाका नखुलेपछि सरकारी अधिकारीहरूकाे भ्रमण स्थगित भएको छ । चिनियाँ पक्षसंगकाे सम्पर्क र समन्वयमा केही हप्तापछि नेपालका सिमावर्ती क्षेत्रका अधिकारीहरूकाे टाेली ताक्लाकाेट जाने तयारी छ ।
काेभीड महामारीका कारण २०७६ सालदेखि बन्द भएको तिंकर नाका पाच वर्षसम्म सञ्चालनमा आएको थिएन । बझाङ जिल्लामा पर्ने उरै नाका पनि केही दिनभित्रै सञ्चालन हुने तयारी छ ।
