दार्चुला, जेठ २१ गते ।
दार्चुलाबाट निर्वाचित प्रतिनिधिसभा सदस्य एवं काग्रेस नेता दिलेन्द्रप्रसाद बडूले टिंकर सडकमा न्यून बजेट विनियोजनबारे अर्थमन्त्री र यातायातमन्त्रीलाई प्रश्न गरेका छन् । त्रिदेशीय सिमाक्षेत्रमा निर्माण भइरहेको महाकाली काेरिडाेर र त्यसअन्तर्गतकाे दार्चुला-टिंकर सडक खण्डबारे सांसद बडूले सरकारसंग प्रश्न उठाएका हुन् ।
नयाँ बजेटमा महाकाली काेरिडाेरलाई उपेक्षा गरिएको उहाँको आराेप छ । उत्तरमा चीन र दक्षिणमा कञ्चनपुरकाे दाेधरा-चादनी सुख्खा बन्दरगाह जाेड्ने याे सडकलाई बजेटले प्राथमिकता नदिएकाे भन्दै ध्यानाकर्षण गराएका छन् ।
पुर्वमन्त्रीसमेत रहेका सांसद बडूले सरकारले महाकाली करिडोरका लागि पर्याप्त जेट नछुट्याएको भन्दै असन्तुष्टि जनाएका छन् । साेमबार संसद बैठककाे बजेट छलफलमा बाेल्दै उहाँले सरकारले पश्चिमी सिमाकाे भुगाेलमाथि अन्याय गरेको बताउनुभयो ।
पवित्र कैलाश-मानसराेवरकाे छाेटाे र सस्तो यात्रा सञ्चालन गर्न महाकाली काेरिडाेर र यसअन्तर्गतकाे दार्चुला-टिंकर सडक खण्डकाे निर्माणले उच्च प्राथमिकता पाउनुपर्ने उहाँको भनाइ छ ।
प्रतिनिधिसभाको बैठकमा उहाँले भन्नुभयाे, ‘महाकाली करिडोरको लागि पर्याप्त बजेट छैन । किन छुटाइयो अर्थमन्त्री र भौतिक मन्त्रीलाई प्रश्न गर्छु । यो एउटा जिल्लाको कुरा मात्रै होइन, हामीले चुच्चे नक्सा भन्दै आएको आएको कालापानी, लिपुलेक र लिम्पियाधुराकाे कुरा हो । यो देशको राष्ट्रियता र स्वाभिमानसँग जोडिएको सडक हाे, जहाँ आज तिंकर र व्यास क्षेत्रबाट सदरमुकाम पुग्नको लागि भारतीय भूमि भएर आउनुपर्छ । त्यो क्षेत्रको जनताले आज सत्तापक्षसँग सोधिरहेका छन् यो नारा र व्यवहार फरक भयो भनेर ।’
