दार्चुला, साउन २४ गते ।
नेपाली सेनाबाट निर्माण भइरहेको दार्चुला–टिंकर सडक आयोजनाका प्रमुख शिवकुमार केसी प्रधानसेनापतिबाट सम्मानित भएका छन् । प्रधान सेनापति प्रभुराम शर्माले बुधवार काठमाण्डौंस्थित जङ्गीअड्डामा टिंकर सडक आयोजनाका प्रमुखको जिम्मेवारी पूरा गरेका कर्णेल केसीलाई प्रधानसेनापति प्रशंसा निशान प्रदान गरेका हुन् ।
साउन २४ देखि एक महिना विदामा बसी भदौ २४ देखि अनिवार्य अवकाश हुन लागेका सेनापति शर्माले बुधवार कर्णेल केसीसहित ५० जना सैनिक अधिकारीलाई प्रशंसा निशान प्रदान गरेका छन् । नेपाली सेनालाई विभिन्न क्षेत्रबाट महत्वपूर्ण योगदान पुर्याएका सैनिक अधिकारीसहित गैरसैनिक क्षेत्रका चारजनालाई पनि सेनापतिले प्रशंसा निशान दिएका छन् ।
बुधवार आयोजित कार्यक्रममा सेनापति शर्माले आफ्नो तीन वर्षे कार्यकालका उपलब्धिहरुको विवरण समेत सार्वजनिक गरेका छन् । दार्चुला–टिंकर सडक निर्माण आयोजनाको प्रमुख भएर दुई वर्षसम्म जिम्मेवारी सम्हालेका कर्णेल केसी सेनापतिको मुल्यांकनमा अब्बल देखिएका छन् ।
२०७९ साउनदेखि टिंकर सडकको आयोजना प्रमुख रहेका कर्णेल केसीको गत साउन १ गते काठमाडौं सरुवा भएको छ । केसी लगातार दुई वर्षसम्म टिंकर सडक आयोजना प्रमुखको जिम्मेवारीमा रहेका थिए । दार्चुला सदरमुकामस्थित नेपाली सेनाको विकास निर्माण गण नम्बर २ को गणपतिको जिम्मेवारीमा समेत केसी कार्यरत थिए ।
कर्णेल केसीले टिंकर सडक आयोजना प्रमुखको जिम्मेवारी सम्हालेको अवधिमा ५ किलोमिटर सडक निर्माण र साढे ३ किलोमिटर सडकको स्तरोन्नती कार्य भएको छ । व्यास गाउँपालिकाको वडा नम्बर ३ तुषारपानीदेखि वडा नम्बर २ तम्बाकुसम्मको १६ दशमलव ३ किलोमिटर लामो क्षेत्रमा सडक निर्माण कार्य भइरहेको छ ।
पर्याप्त बजेट विनियोजन नहुदा टिंकर सडक निर्माणले गति लिएको छैन । तर नेपाली सेनालाई उपलब्ध गराइएको वार्षिक बजेट र लक्ष्यअनुसारको प्रगति हासिल भएको नेपाली सेनाले जनाएको छ । आर्थिक वर्ष २०८०÷८१ मा टिंकर सडकमा १४ करोड १९ लाख र अघिल्लो वर्ष २०७९÷८० मा ९ करोड ५१ लाख रुपैयाँ बजेट दिइएको थियो ।
कठिन भूगोल, अन्तर्राष्ट्रिय सिमाक्षेत्र र स्रोतसाधनको अभाव रहेको अवस्थामा पनि टिंकर सडक निर्माणमा कर्णेल केसीले प्रभावकारी भूमिका निर्वाह गरेको सेनापतिको मुल्यांकन छ । सैनिक मुख्यालयले केसीको ठाउँमा प्रमुख सेनानी राजेश कटवाललाई टिंकर सडक आयोजना प्रमुखको जिम्मेवारी दिएको छ । कटवालले विकास निर्माण गणको पनि नेतृत्व गर्नेछन् । गत साउन १ गते सरुवा भएका कर्णेल कटवालले साउन १८ देखि आफ्नो औपचारिक जिम्मेवारी सम्हालेका छन् ।
