दार्चुला, जेठ १८ गते ।
दार्चुलाको टिंकर नाका जोड्ने गरी छिमेकी चीनले सडक निर्माण गरिरहेको छ । कोभिड महामारीको समयमा नाका बन्द भए पनि छिमेकी चीनले नेपाल–चीनको सिमा नजिकसम्म सडक निर्माण गरेको छ ।
ताक्लाकोट बजारदेखि २२ किलोमिटर यतासम्मको सडक यसअघि नै निर्माण गरिसकेको छ । कोभिड महामारीको समयमा थप ४–५ किलोमिटर सडक निर्माण गरिएको छ । सिबुखोलादेखि माथि १ नम्बर सिमास्तम्भको नजिकसम्म नयाँ सडक निर्माण गरिएको छ ।
चीनिया पक्षले आफ्नो तर्फ बनाइएको सडक सञ्चालनमा ल्याउन मर्मत सम्भारको कार्य गरिरहेको छ । सिबुखोलादेखि माथिल्लो क्षेत्रमा स्काइभेटरसहितका मेसिनहरु प्रयोग गरी सडक मर्मत कार्य भइरहेको व्यास गाउँपालिका वडा नम्बर १ का वडाअध्यक्ष अशोक सिंह बोहराले बताउनुभयो ।
गत जेठ ४ गते टिंकर भञ्ज्याङस्थित १ नम्बर पिलरसम्म पुगेका सशस्त्र प्रहरीका सुरक्षाकर्मीहरुले पनि चीनतर्फ सडक मर्मत भइरहेको दृश्य देखेका थिए । स्काइभेटर मेसिनले सडक मर्मतको कार्य भइरहेको दृश्य सुरक्षाकर्मीले देखेको सुरक्षा स्रोतले बतायो ।
केही महिनाअघि प्रधानमन्त्री पुष्पकमल दाहाल प्रचण्डको चीन भ्रमणका बेला चीनिया प्रतिनिधिमण्डलले नेपाली पक्षलाई ताक्लाकोटदेखि टिंकर भञ्ज्याङतर्फको क्षेत्रमा सडक निर्माण गरिएको जानकारी दिएको थियो । प्रधानमन्त्री नेतृत्वको नेपाली पक्षले भने यस विषयलाई कुनै महत्व दिएको थिएन । त्यतिबेला केही सञ्चारमाध्यमहरुले चीनिया पक्षले दिएको जानकारीलाई समाचारमा सार्वजनिक गरेका थिए ।
नेपाल–चीनको सिमानाबाट आधा घण्टाको पैदल हिडाइपछि सडक मार्गको सुविधा पाइने अवस्था छ । १ नम्बर पिलरदेखि नै नयाँ निर्माण गरिएको सडक देख्न सकिने वडाअध्यक्ष बोहराले बताउनुभयो । ज्युज्युखोलाको पारिपट्टि चीनिया सुरक्षाकर्मीको चेकपोष्ट छ । सिमाक्षेत्रको नियमित गस्ती र रेखदेखका लागि समेत चीनले सडक विस्तार गरेको अनुमान छ ।
ज्युज्युखोलामा मोटरपुल निर्माण गरी सिबुखोलासम्मको कच्ची सडक चीनले यसअघि नै निर्माण गरिसकेको थियो । सिबुखोलादेखि उकालो क्षेत्रमा पनि सडक निर्माण गरिएपछि टिंकर नाका भएर आवतजावत गर्न थप सहज हुने व्यासका स्थानीय बताउँछन् ।
टिंकर भञ्ज्याङदेखि चीनतर्फको भूगोलमा डेढ घण्टा ओरालो झरेपछि सिबुखोला पुगिन्छ । पछिल्लो सडक निर्माणले एक घण्टाको पैदलयात्रा छोट्टिएको छ । आगामी असार ११ गतेदेखि टिंकर नाका सञ्चालनमा आउने तयारी गरिएको छ । दुइ देशका अधिकारीहरुबीच यसबारे भिडियो संवादमार्फत छलफल र सहमति भइसकेको छ ।
