दार्चुला, जेठ १९ गते ।
चीनको सिमा जोड्ने निर्माणाधिन सडकमध्ये सबैभन्दा न्युन बजेट महाकाली कोरिडोरमा छुट्याएको छ । अर्थमन्त्री वर्षामान पुनले जेठ १५ गते संसदमा प्रस्तुत गरेको बजेट विवरणअनुसार निर्माणाधिन ८ वटा सडकमध्ये महाकाली कोरिडोरमा सबैभन्दा कम बजेट विनियोजन गरिएको छ ।
उत्तर–दक्षिण सडक निर्माणअन्तर्गत हाल देशभर ८ वटा रणनीतिक सडकहरु निर्माणाधिन छन् । कर्णाली, कालीगण्डकी र कोशी कोरिडोरलाई सर्वाधिक महत्व दिएर राष्ट्रिय गौरवका योजनामा राखिएको छ । यी तिनवटै कोरिडोरका लागि आगामी वर्ष २०८१÷८२ मा ४ अर्ब ४३ करोड रुपैयाँ विनियोजन गरिएको छ ।
राष्ट्रिय गौरवका यी सडकमध्ये कर्णाली र कालीगण्डकी कोरिडोरको ट्रयाक खुलिसकेको छ भने कोशी कोरिडोरमा २ किलोमिटर मात्रै ट्रयाक खोल्न बाँकी छ । आगामी वर्ष यी तिनवटै सडकको स्तरोन्नती र कालोपत्रे गर्न ठूलो बजेट छुट्याइएको छ ।
हुम्लाको हिल्सा नाका हुँदै चीन जोड्ने कर्णाली कोरिडोरमा मात्र आगामी वर्ष ५० किलोमिटर सडक स्तरोन्नती गर्ने र ५ वटा पुल निर्माण गर्ने लक्ष्य राखिएको छ ।
त्रिदेशीय सिमाक्षेत्र हुँदै टिंकर नाकामा चीनको सिमाना जोड्ने महाकाली कोरिडोरमा आगामी वर्ष ५० करोड बजेट छुट्याइएको छ । कञ्चनपुरको ब्रह्मदेवदेखि दार्चुलाको टिंकरसम्म निर्माणाधिन ४ सय १३ किलोमिटर लामो महाकाली कोरिडोरमा सबैभन्दा कम बजेट छुट्याइएको छ । महाकाली कोरिडोर सडक योजनाअन्तर्गत ३ सय ३४ किलोमिटर र नेपाली सेनामार्फत दार्चुला–टिंकर सडक खण्डको ७९ किलोमिटर सडक निर्माण भइरहेको छ ।
सरकारले आगामी वर्षका लागि छुट्याएको ५० करोड बजेट कोरिडोर योजना कार्यालय र नेपाली सेना दुबैलाई बाँडिने छ । चालू वर्षमा विनियोजित ४३ करोडमध्ये कोरिडोर योजना कार्यालयलाई २९ करोड ६५ लाख र नेपाली सेनालाई १४ करोड १९ लाख रुपैयाँ बजेट दिइएको छ ।
कैलालीको टिकापुरदेखि साफेबगर हुँदै बझाङको उरैनाका जोड्ने सेती लोकमार्गमा आगामी वर्ष ७० करोड रुपैयाँ बजेट छुट्याइएको छ । चालू वर्ष यो सडकमा ३० करोड बजेट दिइएको थियो ।
कर्णाली प्रदेशको जाजरकोट, पश्चिम रुकुम र डोल्पाको भूगोलमा निर्माण भइरहेको भेरी कोरिडोरमा आगामी वर्ष १ अर्ब ६ करोड १६ लाख बजेट विनियोजन गरिएको छ । ऊर्जामन्त्री शक्ति बस्नेत, शहरी विकास मन्त्री धनवहादुर बुढा र पूर्व अर्थमन्त्री जनार्दन शर्माको गृह जिल्ला जोडिने भेरी कोरिडोरलाई बजेट विनियोजनमा उच्च प्राथमिकता दिइएको छ ।
पूर्वी नेपालमा निर्माणाधिन तमोर कोरिडोरलाई नयाँ बजेटले महत्व दिएको छ । आगामी वर्षका लागि तमोर कोरिडोरमा १ अर्ब ८ करोड ६० लाख बजेट छुट्याएको छ । सुनसरीको चतरादेखि मूलघाट–माझीटार दोभान हुँदै ताप्लेजुङको ओलाङचुङगोला जोड्ने यो सडकलाई एमाले अध्यक्ष केपी शर्मा ओली र सचिव योगेश भट्टराईले प्राथमिकता दिएका छन् । केही महिनाअघि ओलीसहित नेता भट्टराई, भौतिक पूर्वाधार मन्त्री र रक्षामन्त्रीसहितको टोलीको यो सडक निर्माणको स्थलगत भ्रमण गरेका थिए ।
तमोर कोरिडोरअन्तर्गत ट्रयाक खोलिसकिएको छ । अब यो सडकलाई स्तरोन्नती गर्दै कालोपत्रे गर्न बजेट विनियोजन गरिएको हो । चीनको तिब्बत क्षेत्रबाट समेत स्काइभेटरसहितको मेशिन उपकरणहरु ल्याएर तमोर कोरिडोरअन्तर्गत टिप्ताला नाकामा ट्रयाक निर्माण कार्य हालै सम्पन्न भएको छ ।
नेपाली सेनामार्फत निर्माण भइरहेको गोरखाको लार्के भञ्ज्याङ जोड्ने सडकमा आगामी वर्ष २७ करोड बजेट छुट्याइएको छ । बेनीघाट–आरुघाट–लार्के भञ्ज्याङ सडकमा चालू वर्ष २० करोड बजेट रहेको छ । प्रधानमन्त्री प्रचण्डको निर्वाचन क्षेत्र रहेको गोरखा जिल्लामा यो सडक निर्माण भइरहेको छ ।
अतिक्रमित नेपाली भूमि छेउका छाङरु र तिंकर गाउँसमेत जोड्ने महाकाली कोरिडोर निर्माणलाई बजेट विनियोजनले उपेक्षा गरेको छ । टिंकर नाका हुँदै पवित्र कैलाश मानसरोवर यात्राको ढोका खोल्ने सम्भावनालाई बजेटले प्राथमिकता दिएको छैन । त्रिदेशीय सिमाक्षेत्र रहेको व्यासमा हाल पैदल हिड्ने बाटो समेत नभएको अवस्थामा महाकाली कोरिडोरअन्तर्गतको सडक निर्माणमा सबैभन्दा न्युन बजेट विनियोजन गरिएको छ ।
