पदम बडाल, दार्चुला ।
दार्चुला जिल्लाको सिमावर्ती क्षेत्र धारचुलाको पुल क्षेत्रमा अलपत्र परेका नेपालीहरुको व्यवस्थापन भारतीय पक्षले गर्ने भएको छ ।
नेपालमा रहेको भारतीयहरुको नेपालले र भारतमा रहेका नेपालीहरुको भारत सरकारले व्यवस्था गर्ने सहमति अनुसार धारचुला क्षेत्रमा रहेका करिब ५ सय नेपालीहरुलाई भारतीय पक्षले क्वारेन्टाइनमा राख्ने भएको हो ।
नेपाल र भारतमा लक डाउन नभएसम्म वा नेपाल र भारत सरकारबीच अर्को सहमति नभएसम्म नेपालीहरुलाई भारतमै क्वारेन्टाइनमा राखिने धारचुला क्षेत्रका उपजिल्ला अधिकारी अनिल कुमार सुक्लले जानकारी दिनु भएको छ ।
धारचुला क्षेत्रमा चार ठाउँ र जौलजिबीमा एक ठाउँ गरी नेपालीहरुलाई पाँच ठाउँमा राखिने छ । धारचुला क्षेत्रमा रहेको मिनि स्टेडियम, बालुवाकोटमा रहेको जिआइसीको भवन, गलातिमा रहेको फायर बिग्रेटको नयाँ भवन, महाकाली नदी किनारमा रहेको गौसाला र जौलजिवी क्षेत्रमा रहेको राम लिला मैदानमा नेपालीहरुको व्यवस्थापन गरिने उपजिल्ला अधिकारी अनिलकुमार सुक्लले बताए । आज भने मिनि स्टेडियम, गलाती र महाकाली नदी किनारमा बनेको गौसालमा नेपालीहरुलाई राखिने छ ।
पटक पटक अनुरोध गर्दा नि नेपालले सुनेनः उपजिल्ला अधिकारी
उपजिल्ला अधिकारी सुक्लले नेपाल सरकारका प्रतिनिधिहरुलाई पटक पटक नेपालीहरुलाई आफ्नो देश लैजान आग्रह गर्दा पनि नसुनेको बताएका छन् ।
उनीहरुमा आफ्नो देश र परिवारसँग बस्ने उत्कट ईच्छा देखिएको भएपनि नेपाल सरकारले उनीहरुको समस्या सम्बोधन गर्न नसकेको तर आफूहरुले नेपालीहरुको खाने, सुत्ने र स्वास्थ्य परीक्षणको व्यवस्था गरेको जानकारी गराएका छन् ।
नेपाल सरकारले चाँडै आफ्नो नागरिकलाई क्वारेन्टाइनमा राख्ने व्यवस्था गर्न सके आफू समन्वय गर्न तयार रहेको उनी बताउँछन् । ‘कोरोनाको प्रकोप यता देखियो भने नेपालीभन्दा भारतीय नै प्राथमिकता पर्ने भएकाले नेपालीहरुलाई नेपाल मै व्यवस्था गर्नु उचित हुन्छ ।’ उपजिल्ला अधिकारी सुक्लले भने ।
लक डाउन भनेको जो जहाँ छ, त्यही बस्ने होः प्रजिअ पौडेल
नागरिकहरुले लक डाउनको अर्थ नबुझेर वा पुल खुल्दै छ भन्ने हल्लाका पछाडि लागेर धारचुलामा जम्मा भएको बताउँदै दार्चुलाका प्रमुख जिल्ला अधिकारी यदुनाथ पौडेलले नागरिकहरुलाई संयमित भएर घरमा बस्न आग्रह गरेका छन् ।
भारतीय क्षेत्रमा मजदुरी गर्न गएका नेपालीहरुले पनि जहाँ छ त्यही बस्नु पर्ने र उनीहरुको व्यवस्था भारत सरकारले गर्ने प्रजिअ पौडेल बताउँछन् । ‘लक डाउन भनेको आवागमन बन्द गर्नु हो, भारत र नेपाल कही पनि आवतजावत गर्न पाइदैन ।’ प्रजिअ पौडेलले भने ।
तरेर आउने तिन जना सम्बन्धित पालिकाको जिम्मा
नेपाल भारत जोड्ने पुल नखोलिएपछि दिउँसो महाकाली नदीमा पौडेर आएका तिन जनालाई उनीहरुको पालिकाको जिम्मा लगाइएको छ ।
आज दिउँसो बैतडी डिलाशैनीका इन्द्रसिह खाती र धनबहादुर धामी तथा दार्चुला मार्मा गाउँपालिका वडा नम्बर ३ का रमेश बिस्ट महाकाली तरेर दार्चुला प्रवेश गरेका थिए । उनीहरुलाई सम्बन्धित पालिकाको जिम्मा लगाइएको प्रजिअ पौडेलले बताउनु भएको छ । ‘१४ दिन क्वारेन्टाइनमा सर्त सहित उनीहरुलाई सम्बन्धित पालिकाको जिम्मा लगाइएको छ ।’ उनले भने ।
प्रहरी चौकीमा ढुंगा प्रहार र आपसमा झगडा
धारचुलामा रहेका नेपालीहरुले पुल नखोलेको भन्दै दिउँसो पुल क्षेत्रमा नेपालतिर रहेको प्रहरी चौकीमाथि ढुंगा प्रहार गरेका थिए ।
महाकाली पारीबाट ढुंगा हान्ने र गाली गर्ने काम निरन्तर भएपछि भारतीय प्रशासनलाई त्यसको जानकारी दिएर साम्य पार्न लगाइएको थियो ।
नेपालको प्रहरी चौकीमाथि ढुंगा हान्ने र नहान्ने दुई समूहमा नेपालीहरु विभाजित भएको र सोही विषयलाई लिएर आपसमा झगडा समेत भएकाले स्थिति नियन्त्रणमा लिन एसडिएम समेत घटना स्थलमा आउनु परेको धारचुलाका स्थानीय पत्रकार राकेश तिवारी बताएका छन् ।
