दुहुको सल्लेखेतीमा घर पहिरोले पुरिदा दुई जना बेपत्ता

253

दार्चुला, साउन १३ गते ।
दुहु गाउँपालिकाको वडा नं ३ को सल्लेखेतीमा मंगलबार बिहान करिब ५ बजे तिर माथिबाट घरमा पहिरो खस्दा एकै परिवारका दुई जना बेपत्ता भएका छन् ।
सल्लेखेतीका ५० बर्षिय राम दत्त जोशी र  श्रीमती ४५ बर्षिय इन्द्रा जोशी बेपत्ता भएको उहाँका २१ बर्षिय छोरा सुनिल जोशीले प्रहरीलाई जानकारी दिएको जिल्ला प्रहरी कार्यालय दार्चुलाका प्रहरी निरिक्षक एबं सूचना अधिकारी सुरेन्द्र प्रसाद जोशीले जानकारी दिनुभयो ।
घटनास्थल व्रह्मदेब प्रहरी चौकीबाट नजिक रहेकाले प्रहरी टोली विहानै घटनास्थलमा पुगेर उद्धार कार्य भइरहेको र जिल्ला प्रहरी कार्यालय दार्चुलाबाट प्रहरी निरिक्षकको नेतृत्वमा टोली विहान ६ बजे घटना स्थलतर्फ गएको प्रहरी निरिक्षक जोशीको भनाई छ ।
२ तले टिनको छत भएको घरमा पहिरो खस्दा १ भैसि र ४ बाख्रा पनि पुरीएका छन् । दार्चुला तिंकर सडकबाट आएको पानीले माथिबाट पहिरो खस्दा घटना भएको दुहु गाउँपालिका उपाध्यक्ष इश्वरी जोशीले घटनास्थलबाट जानकारी दिनुभएको छ । घर पुरै पुरीएको र विहानै घटनास्थलमा पुगेर जनप्रतिनिधी, प्रहरी र स्थानियहरु उद्धार कार्य गरिरहेको उहाँको भनाई छ । घटनामा बेपत्ता जोशी दम्पतीका छोरा सुनिल जोशी विहान संयोगले बाहिर आएका बेला घरमा पहिरो खसेको बताइएको छ । घटनाको थप विवरण आउन बाकी छ ।

तपाईको प्रतिक्रिया दिनुहोस् !