दार्चुला, चैत्र २४ गते।
नेपाल भारत जाड्ने सबै पुलहरु बन्द भएर नेपालीहरु भारत मै बस्न बाध्य रहेको अवस्थामा महाकाली नदी तरेर नेपाल आउनेहरुलाई रोक्न महाकाली नदी किनारमा निगरानी बढाइने भएको छ ।
महाकाली नदीबाट नेपालीहरु भित्रिने क्रम बढेपछि चौबिसै घण्टा निगरानी राख्ने गरी सशस्त्र प्रहरी बल परिचालन गरिएको प्रमुख जिल्ला अधिकारी यदुनाथ पौडेलले जानकारी दिनुभएको छ ।
दार्चुलाको लाली, जौलजिवी, स्याकु र दुम्लिङमा सशस्त्र प्रहरीले निगरानी राख्नेछ । ‘हामीले नदी किनारमा २४सै घण्टा निगरानी राख्ने काम गरेका छौं । कसैले अटेर गरे कानुन अनुसार कारवाही गरिने छ ।’ प्रजिअ पौडेलले भने ।
ब्यास गाउँपालिका वडा नम्बर दुई दुम्लिङ, वडा नम्बर पाँच धौलाकोटको स्याँकु, मालिकार्जुन गाउँपालिका वडा नम्बर ७ जोलजिवी र लेकम गाउँपालिका वडा नम्बर ३ लालीमा १०÷१० जनाको दरले सशस्त्र प्रहरी परिचालनको तयारी भएको हो ।
दार्चुलामा थप सुरक्षाकर्मी आवश्यक पर्ने भएकाले तत्काल थप सुरक्षाकर्मी थपिने पनि उहाँले जानकारी दिएका छन् ।
