दार्चुला, असोज ९ गते ।
नेपाल सरकारका गृहमन्त्री राम बहादुर थापा (बादल) को दार्चुला भ्रमण र कार्यक्रम बारे पत्रकारहरुलाई जानकारी नगराएको प्रति पत्रकार महासंघ दार्चुलाले खेद प्रकट गरेको छ ।
भ्रमण कार्यक्रमबारे जिल्ला स्थित पत्रकारहरुले जिल्ला प्रशासन कार्यालय दार्चुला र सशस्त्र प्रहरी बल ४४ नम्बर गणमा पटक–पटक सम्पर्क गर्दा पनि जानकारी नदिइएको र केहि पत्रकारहरुको फोन रिसिभ गर्ने कार्य समेत नभएकाले मिडिया क्षेत्रलाई उपेक्षा गरिएको भन्दै पत्रकार महासंघ दार्चुला शाखाले एक विज्ञप्ति जारि गर्दै खेद प्रटक गरेको छ ।
भारताबाट अतिक्रमित नेपाली भूमी कालापानी क्षेत्र नजिकको छाङरु गाउँमा निर्माण गरिन लागेको सशस्त्र प्रहरी गुल्म भवनको शिलान्यास गर्न भएको यो उच्च स्तरिय भ्रमणले सिमाक्षेत्र र सिमा क्षेत्रका नागरिक उत्साहित भएका छन् । नेपाल सरकारले सिमा सुरक्षाको विषयलाई उच्च प्राथमिकता दिएको छ भन्ने यो भ्रमणले सन्देश दिएको छ, विज्ञप्तिमा भनिएको छ ।
गृहमन्त्री सहित उच्चस्तरीय भ्रमण हुदाँ नागरिक स्तरमा चासो र सरोकार हुनु स्वभाविक रहेको र नागरिकको चासो र सरोकारको विषयलाई जोड्ने जिम्मेवारी मिडियाको रहेकोमा जिल्ला स्थित स्थानिय प्रशासन र सशस्त्र प्रहरी गणका प्रमुखबाट प्रर्दशन गरिएको ब्यहार र देखाइएको भुमिका खेदजनक छ, विज्ञप्तिमा उल्लेख छ ।
गृहमन्त्री जस्तो उच्च स्तरको भ्रमण हुदाँ प्रमुख जिल्ला अधिकारी र गणपति नै जानकार विहिन हुने अवस्था भए गैरजिम्मेवार र दयनिय अवस्था भएको तथा नियतवस नै सञ्चारकर्मीहरुलाई जानकारी नगराइएको भए यो गलत र खेदजनक प्रवृती सबैका लागि घातक हुने विज्ञप्तिमा भनिएको छ ।
लोकतान्त्रिक शासन ब्यवस्थामा मिडियाको भूमिकालाई उपेक्षा गर्ने र गैरजिम्मेवार प्रवृतीका विरुद्ध दार्चुलाका मिडियाकर्मीहरुको कलम सशक्त चलिरहने पत्रकार महासंघको भनाई छ ।
